Брытанка ў 45 гадоў кардынальна змяніла лад жыцця і схуднела на 25 кг

• 9.07.2025, 12:15

Дапамаглі тры літры вады і 12 тысячаў крокаў штодзень.

45-гадовая жанчына з Вялікай Брытаніі поўнасцю змяніла лад жыцця. З новымі звычкамі яна схуднела больш чым на 25 кілаграмаў і стала нашмат здаравейшай.

Пра гэта сёння, 9 ліпеня, паведаміла What's the Jam. Раней Ліндсі Кендал з ангельскага горада Болтан сілкавалася тлустай ежай і «дастаўкамі», яна сама магла «спакойна выпіць бутэльку чырвонага віна» ці нават дзве за выходныя. Сітуацыя дайшла да таго, што Ліндсі стала цяжка дыхаць і паднімацца па ўсходах. Жанчына адчувала сябе так, быццам ёй за 70 – зусім не было энэргіі.

Калі 45-гадовая брытанка ўбачыла на вагах 13 стоўнаў і 1 фунт (прыкладна 83 кг), яна пастанавіла кардынальна змяніць сваё жыццё. Ліндсі пачала займацца сілавымі трэніроўкамі, схуднела больш чым на 25 кілаграмаў і цяпер яна выглядае маладзей, чым калі-небудзь.

«Многія жанчыны думаюць, што яны пачнуць выглядаць як мужчыны, калі будуць падымаць цяжкую вагу. Я доказ таго, што гэта зусім не так», – расказала жанчына ў інтэрв'ю What’s the Jam.

Яе першы сакрэт пахудання – адмова ад салодкіх прадуктаў і простых вугляводаў, якія не прыносяць карысці арганізму. Яна таксама п'е не менш за тры літры вады ў дзень, і яе галоўная рада – штодня праходзіць 12 000 крокаў.

«Гэта неверагоднае адчуванне – дэманстраваць сваё цела ў бікіні, але яшчэ лепш – мець столькі энэргіі.

Нядаўна я ўдзельнічала ў фотасесіі, і мне было прыемна ганарыцца сваім целам», – падсумавала брытанка.

Цяпер Ліндсі працуе аператаркай станкоў і з'яўляецца кантэнт-крыэйтарам з 10500 падпісчыкамі, дзе яна апавядае пра сваё жыццё і дае парады.