У Дзярждэпе ЗША пацвердзілі аднаўленне паставак зброі Украіне
- 9.07.2025, 12:51
Паўза не сведчыла пра новую палітыку ці пазіцыю Вашынгтона.
Нягледзячы на непакой і шум вакол спынення ваенных паставак, высветлілася, што трэба было толькі пачакаць. Паўза ў адпраўцы ўзбраенняў не сведчыла пра новую палітыку ці пазіцыю Вашынгтона. Пра гэта падчас брыфінгу 8 ліпеня заявіла прэс-сакратарка Дзяржаўнага дэпартамента ЗША Тэмі Брус, паведамляе сайт Пентагона.
«Мы былі і застаемся самымі вялікімі прыхільнікамі Украіны. Мы клапоцімся пра гэтых людзей. Мы клапоцімся, каб яны мелі ўсё неабходнае», – запэўніла яна.
Прадстаўніца Дзярждэпа адзначыла, што Трамп дакладна гаварыў пра масавыя забойствы ва Украіне і неабходнасць іх спыніць з дапамогай узаемнага перамір'я. Яна пацвердзіла, што пастаўкі зброі адноўленыя, а прэзідэнт ЗША «вельмі горача і катэгарычна настроены датычна здольнасці Украіны абараніць сябе».
Брус запэўніла, што паўза ў пастаўках была звязаная са стандартным пераглядам усёй зброі і дапамогі, якую ЗША даюць усім краінам і рэгіёнам свету. Яна расказала, як пасля тэлефоннай размовы Зяленскага Трамп станоўча адгукнуўся пра званок і заявіў, што будзе прадаўжаць дапамагаць украінскаму лідару.
«Таму зноў жа, мы ім дапамагалі, дапамагаем і будзем дапамагаць. Гэта даволі складаная сітуацыя. І гэта – наша пазіцыя. Так было заўсёды, і я радая, што пасля мінулага тыдня тут з'явілася пэўная яснасць», – дадала прэс-сакратарка.
Таксама яна пракаментавала мірныя намаганні Трампа і адказала пра ягоны давер да прэзідэнта РФ Уладзіміра Пуціна. Паводле словаў Брус, рэспубліканец прыкладае намаганні, застаецца адданым перш за ўсё дыпламатыі і не здаецца. Яна падкрэсліла, што калі б перамовы будаваліся на даверы, не існавала б ніякіх дамоўленасцяў з людзьмі, якія нясуць смерць і разбурэнні. Аднак размова ідзе пра іншае – стварэнне ўмоваў, пры якіх гэтыя людзі абавязаныя прытрымлівацца пэўнай дынамікі, каб не заплаціць пэўны кошт.
«Для гэтага не абавязкова давяраць камусьці. Трэба мець асяроддзе, якое нехта – толькі, шчыра кажучы, Дональд Трамп і Злучаныя Штаты – можа стварыць, каб паставіць пэўных людзей на шлях, які з'яўляецца найлепшым для міру і іх уласных краінаў», – запэўніла прадстаўніца Дзярждэпу.
Яна падкрэсліла, што Трамп – адкрыты чалавек, але не наіўны, і ён дакладна ведае, чаго імкнецца дасягнуць.