Пуцін панікуе: доказ знайшлі проста ў ягонай рэзідэнцыі

• 13.08.2025, 13:03

Новую СПА на Валдаі параўналі з абаронай Масквы.

Вакол рэзідэнцыі нелегітымнага прэзідэнта краіны-агрэсаркі Уладзіміра Пуціна на Валдаі ў Наўгародскай вобласці ўсталяваныя 12 комплексаў супрацьпаветранай абароны. Да такой высновы пасля аналізу спадарожнікавых звестак прыйшлі журналіст «Радыё Свабода» Марк Крутаў і OSINT-даследчык jembob.

12 жніўня jembob звярнуў увагу на спадарожнікавыя здымкі «Яндэкс.Карт», дзе былі заўважаныя новыя пазіцыі сістэм СПА на Валдаі. Крутаў праверыў гэтыя звесткі і стварыў інтэрактыўную карту, на якой пазначаны выяўленыя комплексы, сярод якіх ЗРК «Панцыр-С1» і С-400.

«Колькі вежаў СПА трэба Пуціну, каб прыкрыць сваю рэзідэнцыю на Валдаі (зялёны значок), дзе, як вядома, даволі шмат часу праводзяць ягоныя сыны і іх маці – Аліна Кабаева? Паводле новых звестак jembob, цяпер іх 12», - напісаў Крутаў.

Расейская служба «Радыё Свабода» адзначае, што 12 вежаў з «панцырамі» вакол рэзідэнцыі Пуціна – гэта пятая частка ад усёй СПА, якая, паводле адкрытых звестак, з 2022 года абараняе Маскву і Маскоўскую вобласць. Насельніцтва сталічнага кангламерату складае больш за 20 млн чалавек.