«Знік увесь бензін, прадаюць толькі па талонах»

• 1.09.2025, 8:07

Паліўны крызіс закрануў не толькі расійскія рэгіёны.

Паліўны крызіс Расіі закрануў і акупаваныя Крамлём тэрыторыі Украіны. На захопленай частцы Луганскай вобласці з заправак знік увесь бензін марак АІ-92 і АІ-95.

Пра гэта пішуць расійскія прапагандысцкія СМІ і паблікі, заўважыў «Дыялог».

У акупацыйнай адміністрацыі сцвярджаюць, што адсутнасць бензіну звязаная з перабоямі ў пастаўках і «павышаным спажывецкім попытам на паліва, які назіраецца на працягу апошніх двух тыдняў».

Прапагандысты пацвярджаюць, што на працягу двух тыдняў на мясцовых запраўках бензін быў у дэфіцыце: запраўляцца можна было не ўсюды і не заўсёды. Паведамляецца, што часта паліва прадавалі толькі «юрыдычным асобам» па талонах.

«Мясцовыя распавядаюць: дзесьці 95-ы ўсё ж можна знайсці, але адпускаюць не больш за 20 літраў у адны рукі», — распавядаюць прапагандысты.